केंद्रीय मंत्रिमंडल शुक्रदिन प्रधानमंत्री उज्ज्वला योजना (पीएमयूवाई) केर तहत 2025-26 लेल 12 हजार करोड़ टकाक सब्सिडीकेँ मंजूरी देलक अछि। रक्षाबंधनसँ ठीक पहिने लेल गेल एहि फैसलासँ 10.33 करोड़ परिवारकेँ फायदा होएत। एकर संगहि केंद्रीय मंत्रिमंडल तेल विपणन कंपनी (ओएमसी) केँ 30 हजार करोड़ रूपयाक एलपीजी सब्सिडीकेँ मंजूरी दऽ देलक अछि।
सूचना आ प्रसारण मंत्री अश्विनी वैष्णव शुक्रदिन मंत्रिमंडलमे लेल गेल एहि फैसलाक जानकारी देलनि।
पीएमयूवाई योजना मई 2016 मे शुरू कयल गेल छल जे देशभरिमे गरीब परिवारक वयस्क महिलाकेँ मुफ्त एलपीजी कनेक्शन उपलब्ध कराओल गेल छल। 1 जुलाई धरि भारतमे करीब 10.33 करोड़ पीएमयूवाई कनेक्शन अछि।
सरकारक आधिकारिक बयानमे कहल गेल अछि कि, “प्रधानमंत्री नरेंद्र मोदीक अध्यक्षता वला केंद्रीय मंत्रिमंडल वित्तीय वर्ष २०२५-२६ केर दौरान प्रधानमंत्री उज्ज्वला योजना (पीएमयूवाई) केर लाभार्थीकेँ प्रति वर्ष ९ रिफिल (५ किलो सिलेंडर लेल) केर लेल १४.२ किलो सिलेंडर पर ३०० रुपयाक सब्सिडीक मंजूरी दऽ देल गेल अछि। 12 हजार करोड़ रुपया खर्च होएत।” भारत अपन एलपीजी आवश्यकताक लगभग 60 प्रतिशत आयात करैत अछि।
कैबिनेट बैसारक बाद केंद्रीय मंत्री अश्विनी वैष्णव कहलनि जे प्रधानमंत्री उज्ज्वला योजनाकेँ समावेशी विकास लेल वैश्विक स्तर पर मान्यता देल गेल अछि। प्रधानमंत्री उज्ज्वला योजनाक उद्देश्य जनताक जीवनमे परिवर्तन आनब अछि। एखन धरि 10.33 करोड़ उज्ज्वला कनेक्शन देल गेल अछि। कैबिनेट वित्तीय वर्ष 2025-26 केर लेल पीएम उज्ज्वला लाभार्थीकेँ 12,060 करोड़ रूपयाक सहायताक मंजूरी दऽ देलक अछि।
केंद्र सरकार शुक्रदिन तमिलनाडुमे मराक्कनम-पुडुचेरी नेशनल हाईवेकेँ फोर लेन बनेबाक परियोजनाकेँ मंजूरी दऽ देलक अछि। एहि परियोजना पर कुल 2157 करोड़ रूपया खर्च होएत। ई फैसला प्रधानमंत्री नरेंद्र मोदीक अध्यक्षतामे आर्थिक मामिला पर कैबिनेट समितिक बैसारमे लेल गेल अछि।
वर्तमानमे चेन्नई, पुडुचेरी विल्लुपुरम आ नागापट्टिनमक बीच संपर्क मौजूदा 2 लेन राष्ट्रीय राजमार्ग 332ए आ ओकरा जोड़यवला राज्य राजमार्ग पर निर्भर करैत अछि। एकरा पर भारी ट्रैफिकक कारण खास कय घन आबादी वला इलाका आ गलियारा कातक प्रमुख शहरमे बहुत भीड़ अछि। आधिकारिक बयानक अनुसार मराक्कनमसँ पुडुचेरी धरि एनएच-332ए केँ लगभग 46 किलोमीटरक हिस्साकेँ 4 लेनमे अपग्रेड कयल जायत।
