प्रायः प्रतिदिन २ लाख लोक कऽ रहल दर्शन
*
अयोध्या
*
अयोध्यामे नवनिर्मित राम मन्दिरमे राम भक्त खुलि कऽ दान कऽ रहल छथि। पिछला दस दिनमे रामललाकेँ १२ करोड़ चढ़ाओल गेल। रामललाक प्राण-प्रतिष्ठा दिन २२ जनवरीकेँ समारोहमे पहुँचल आठ हजार अतिथि सेहो पूर्ण श्रद्धाक सङ्ग कोष समर्पण कयलनि। एहि कारण २२ जनवरीकेँ रामललाकेँ ३.१७ करोड़क दान भेटल।
प्रतिदिन औसतन २ लाख लोक अयोध्याक दर्शन कऽ रहल छथि। श्रद्धालु लोकनि भगवान रामलला पर खुलि कऽ पाइ बरसा रहल छथि। मन्दिरमे देल गेल चढ़ावाक हिशाब रखबाक लेल १०टा काउंटर स्थापित कयल गेल अछि, जाहि पर दानक रसीद देल जाइत अछि।
प्राप्त जानकारीक अनुसार २२ जनवरीकेँ ३.१७ करोड़, २३ जनवरीकेँ २.९० करोड़, २४ जनवरीकेँ २.४३ करोड़, २५ जनवरीकेँ १२.५० लाख, २६ जनवरीकेँ १.१५ करोड़, २७ जनवरीकेँ ३१ लाख, २८ जनवरीकेँ ३४.२५ लाख, २९ जनवरीकेँ ३२.५० लाख, ३० जनवरीकेँ २९.१५ लाख आ ३१ जनवरीकेँ ५४.४२ लाख चढ़ावा आयल।
नवनिर्मित राम मन्दिरक वार्षिक उत्सव सारणी तैयार कऽ लेल गेल अछि। नव मन्दिरमे पहिल पाबनिक रूपमे १४ फरवरीकेँ बसंत पंचमी मनाओल जायत। एहिमे देवी सरस्वतीक पूजा कयल जायत। सांस्कृतिक कार्यक्रम होएत। वर्षमे राम मन्दिरमे १२ टा प्रमुख उत्सव वा पाबनि मनाओल जायत।
