बिहारक मुख्यमंत्री नीतीश कुमार बुधदिन वीडियो कॉन्फ्रेंसिंगक माध्यमसँ बाढ़ प्रभावित इलाकामे भऽ रहल राहत आओर बचाव कार्यक उच्च स्तरीय समीक्षा केलनि आओर अधिकारीकेँ जरूरी निर्देश देलनि।
मुख्यमंत्री राज्यक नदीक जल स्तरक अपडेट स्थितिक बारेमे सेहो पूछताछ केलनि। अधिकारी सबकेँ स्पष्ट निर्देश दैत मुख्यमंत्री नदी केर कातक इलाकामे बढ़ैत जलस्तर केर ध्यानमे राखैत प्रशासनसँ पूर्ण सतर्क रहय आ प्रभावित लोककेँ जल्दसँ जल्द आ पूर्ण संवेदनशीलताक संग मददि करय लेल कहलनि।
ओ कहलनि जे, सत्तामे अयला केर बादेसँ हम सब आपदा पीड़ितक मददि करय लेल सतत तैयार रहलहुँ अछि। मानसूनसँ पहिने संभावित बाढ़ि, रौदी आ अन्य आपदाक संबंधमे तैयारीक समीक्षा कएल जाइत अछि आओर सभकेँ एसओपीक अनुसार काज करय केर निर्देश देल गेल अछि।
मुख्यमंत्री बाढ़ि प्रभावित लोकमे एक्स-ग्रेशिया राहत राशिकेँ जल्दसँ जल्द बांटबाक आ फसलक नुकसानक लेल किसानक बीच राशि देबाक निर्देश सेहो देलनि। ओ कहलनि जे, पथ निर्माण विभाग आ ग्रामीण निर्माण विभागकेँ बाढ़िसँ क्षतिग्रस्त सड़कक जीर्णोद्धार सुनिश्चित करबाक चाही ताकि लोककेँ आवागमनमे कोनो तरहक समस्याक सामना नहि करय पड़य। बैसारमे विकास आयुक्त सह आपदा प्रबंधन विभागक अपर मुख्य सचिव प्रत्यय अमृत मुख्यमंत्रीकेँ बाढ़ि प्रभावित क्षेत्रमे राहत आ बचाव काजक अद्यतन स्थिति आ नदीक जलस्तरक संबंधमे विस्तृत जानकारी देलनि।
ओ जनतब देलनि जे भारी वर्षाक कारण गंडक नदीक कातक 10 जिला भोजपुर, पटना, सारण, वैशाली, बेगूसराय, लखीसराय, मुंगेर, खगड़िया, भागलपुर आ कटिहार विशेष रूपसँ प्रभावित भेल अछि। एहि 10 जिलाक 54 प्रखंडक 348 पंचायतक 25 लाख आबादी बाढ़िसँ प्रभावित भेल अछि। एनडीआरएफक सात टीम आ एसडीआरएफ केर 9 टीम राहत आ बचावक काजमे लागल अछि। 60 मोटर बोट आ 1233 नाव लगातार काज कय रहल अछि। एखनि धरि प्रभावित लोकमे 52,573 पॉलीथीन शीट आ 1800 ड्राई राशन पैकेट बांटल गेल अछि।
संगहि बाढ़ि राहत शिविरमे प्रभावित लोकक लेल मानक संचालन प्रक्रियाक अनुसार सब व्यवस्था कयल गेल अछि। एखनि धरि सामुदायिक रसोई केंद्रमे 13 लाखसँ बेसी लोकक भोजनक व्यवस्था कयल गेल अछि। पशुक चारा आ चिकित्साक व्यवस्था कएल गेल अछि । आपदा प्रबंधन विभाग रोज राहत आ बचाव कार्यक समीक्षा कय स्थितिक निगरानी कय रहल अछि।
