बिहारक मुख्यमंत्री नीतीश कुमार युवासॅं पैघ वादा कयलनि। ओ कहलनि जे हुनक सरकार बिहारमे युवाकें एक करोड़ सरकारी नौकरी आ रोजगारक अवसर देत। नीतीश सरकारक मंत्रिमंडल सेहो श्रम विभागक प्रस्तावकें मंजूरी दऽ देलक अछि।
बिहार मंत्रिमंडल मंगलदिन अगिला पांच सालमे ‘एक करोड़ रोजगार आ रोजगारक अवसर’ बनेबाक प्रस्तावकें मंजूरी द देलक। मंगलदिन मुख्यमंत्री नीतीश कुमारक अध्यक्षतामे भेल मंत्रिमंडलक बैसारमे श्रम विभाग द्वारा एहि प्रस्तावकेँ मंजूरी देल गेल। विकास आयुक्तक अध्यक्षतामे 12 सदस्यीय समितिक गठनक सेहो निर्णय लेल गेल जे संभावनाक खोज आ एहि संबंधमे निर्णय लेत।
मुख्यमंत्री नीतीश कुमार रविदिन घोषणा कयने छलथि जे ‘अगिला पांच साल (2025 सॅं 2030) लेल हम सभ एक करोड़ युवाकें सरकारी नौकरी आ रोजगारक अवसर उपलब्ध करा कए 2020-25 केर लक्ष्यकें दुगुना करबाक लक्ष्य रखने छी। एकरा प्राप्त करय लेल निजी क्षेत्र खास कय औद्योगिक क्षेत्रमे नव रोजगार आ रोजगारक अवसर पैदा कयल जायत। एहि लेल एकटा उच्च स्तरीय समिति बनाओल जा रहल अछि।
एहि सालक अंतमे होबय वला विधानसभा चुनावसॅं पहिने ई फैसला महत्वपूर्ण मानल जा रहल अछि।
