रेल आ सूचना प्रौद्योगिकी मंत्री अश्विनी वैष्णव मंगलदिन कहलनि जे भारतक पहिल बुलेट ट्रेनक लेल विभिन्न स्टेशनक निर्माणमे महत्वपूर्ण प्रगति भेल अछि आ हम २०२६ मे एकटा सेक्शनमे पहिल बुलेट ट्रेन चलयबाक लेल तैयार छी।
एकटा साक्षात्कारमे केंद्रीय मंत्री अश्विनी वैष्णव कहलनि कि अहमदाबाद-मुंबई मार्ग पर बुलेट ट्रेनक काज बहुत नीक जकाँ चलि रहल अछि। २९० किलोमीटरसँ बेसी पर काज भऽ चुकल अछि। एकरा लेल आठ नदी पर पुल बनाओल गेल अछि। १२ स्टेशन पर काज चलि रहल अछि। कतेको स्टेशन अछि जकर काज पूरा होबय बला अछि। संगहि दूटा डिपो पर काज चलि रहल अछि।
केन्द्रीय मंत्री कहलनि जे २०२६ मे बुलेट ट्रेनक पहिल खंडक संचालनक काज बहुत तेज गतिसँ चलि रहल अछि। ओ कहलनि “बुलेट ट्रेन बहुत जटिल परियोजना अछि। एहि पर काज २०१७ मे शुरू भेल आ डिजाइनकेँ पूरा करबामे लगभग अढ़ाई साल लागल।”
केंद्रीय मंत्री कहलनि “एकर डिजाइन बहुत जटिल अछि किएक तँ जाहि गतिसँ ट्रेनकेँ चलय पड़ैत अछि, कम्पन बहुत तेज होइत अछि।
अश्विनी वैष्णव विस्तारसँ कहलनि, ओहि स्पंदनक प्रबंधन केना कयल जाय ? जँ हमरा उप्परसँ करंट लेबए केर अछि, तऽ ओ करंट केना लेब ? ओकर गति, एरोडायनमिक्स आदि सभ चीजकेँ बहुत सावधानीसँ देखय पड़त आ ओकर तुरन्त बाद काज शुरू भऽ जायत।
केंद्रीय मंत्री कहलनि कि बीच-बीचमे कोविड महामारीक कारण कने झटका लागल छल।
आगू मंत्री कहलनि “महाराष्ट्रमे उद्धव ठाकरे सरकार अनुमति नहिं देने छल, जाहिसँ परियोजनामे देरी भेल। मुदा, आब काज बहुत बढ़ियासँ प्रगति कए रहल अछि।
केन्द्रीय मंत्री कहलनि जे बुलेट ट्रेन गलियारामे २१ किलोमीटर नमगर सुरंग अछि, जाहिमे समुद्रक नीचा ७ किलोमीटर सेहो शामिल अछि। सुरंगक सबसँ गहींर सुरंग ५६ मीटर नीचा अछि। एहि सुरंगक भीतर बुलेट ट्रेन ३००-३२० किमी प्रति घण्टाक गतिसँ चलत।
जापानक शिंकानसेन प्रौद्योगिकी (जकरा बुलेट ट्रेनक नामसँ सेहो जानल जाइत अछि) केर उपयोग करैत मुम्बई आ अहमदाबादक बीच उच्च गति रेलक निर्माण करब आ लोकक लेल तेज गति वाला परिवहन प्रणाली विकसित करब एकर उद्देश्य अछि।
